Fale Sinah Zeitik Ah Dah Carel Kan Thawk Lai? - An Chuah Kaa Tein

Par
Mar 27
2 min read

Updated: Jun 16

Ca rel cu a biapi ngai mi pakhat a si ti hi tampi nih cun kan fian. Nain pakhat kan Laimi zatlangbu ah kan hmuh khawh mi cu, tampi hngakchia, mino, hi ca rel kan fuam lo ngai. Atu Kentwood area ah tang 6-7 tiang cheukhat hngakchia cu, ca zong ttha tthi in an ttial thiam lo i, cauk zong hi sau an relkho lo. Cucaah sianginn ahcun, carel hi a biapi bik subject pakhat ah an chiah mi asi. Carel hi hngakchiat lio te in, i thok a herh.

Atu ah hin, fale carelpiaknak a biapitnak kong chim ka van duh. Mirang nih cun Read Aloud, an ti i, hngakchia carel piak khi asi ko. Aw thang in ca kan relpiak mi hna khi asi. Hihi sianginn Elementary ahcun, fakpi in saya/sayamah nih focused mi zong asi.

Zeitik Ah Dah Carel Piak Kan Thawk Lai?

Hngakchia cu, kum 6-7 in, carel thiam an i thawk asi. Nain, zeitik ah dah kan fale sinah carel piak kan thawk khawh lai? Mem Fox hi Austrilian hngakchia cauk ttialtu le carelnak lei ah dirkamhtu nu pakhat asi. A mah nih a timi cu, kan fale hi an chuah kaa te in ca relpiak hi thawk ding asi ati. Holh an thiam hnu lawng ah rel pi ding asi lo. Hngakchia hi, cauk le holh lei ah tuan tein kan chimh hna ah cun, a tthatnak tampi a um. Mem Fox nih bawhte an si lio ahhin (holh an thiam hlan ah), holh an cawn hram aa thok cang ati. Biafang le, aw le, biafang sining hi an theih khawh. Hi nih hin, holh thiamnak tampi a pek hna.

Nifatin in ca kan rel piak mi nih - minute 3-5 te lawng asi zongah - fale caah tampi tthatnak a chuah ter.

Carelnak Nih Tthatnak A Chuahter Mi:

Cauk duh dawtnak. An upat deuh tik zongah carel an duh deuh lai.
Zohkhenhtu/relpiaktu (nu/pa/unau/saya/mah) hna he pehtlaihnak a fehter.
Nunchung ca cawnnak caah hrampi a bunh.
Tuanbia nih hin, hnagkchia an thluak, khuraruahnak ah rian a ttuan. An zaanmang, ruahnak le buaibainak tawlrel khawhnak lei tiang in a bawm hna.
Vawlei kong theih duhnak le cawn duhnak lungthin a ngeihter hna.
Carelnak nih hngalhnak le fimnak tampi a chuahpi.
Hngakchia zong nih nulepa he carel tti cu an i nuamhnak pakhat asi ve. An caah a sunglawi mi thil asi.

Zeitin Dah Kan Fale Sinah Caan Kan Pek Khawh Lai?

Caan pek hi a har cem mi cu a si ko. Zaan ih lai, sianginn lawi hnu, si lo le free time na ngeih caan ah khan rel pi ko hna. Mirang holh kan thiam lo zongah, an pawng te ah kan um pi kho ko hna. Hnagkchia cauk cu hmanthlak a cuang mi a tam caah, a hmanthlak zoh pi nak in, chimh khawh zong asi. A biapi mi cu caan hman tti le rel tti kha asi ko. Example tete kha a tangah ka van chiah hna. Duh cun, zoh khawh asi.

Hihi nuamhnak saw sawh ah, rel khawh asi. Print hnua ah, riam le staple tu a herh. Cauk tak tak tu cu hmailei deuh ah chuak te lai.